Skamtan

Tað er læknin, sum sendir skamt­an­artoyminum á apotekinum skamtanarforskrift gjøgnum talgildu heilsuskipan­ina. Tí skalt tú seta teg í samband við læknan, um tú ynskir at fáa skamtan.

Harumframt skalt tú melda teg til sjálvvirkandi GjaldSkipanina.

Tilmelding til sjálvvirkandi GjaldSkipanina

Fyll tilmeldingarskjalið Tilmelding til skamtan út og

• send tað til skamtan@apotek.fo
• lat tað inn á nærmasta apoteki ella send tað til
• Skamtanartoymið; Staravegur 15, 100 Tórshavn

Tá læknin hevur sent okkum skamtanarforskriftina, og tú hevur meldað teg til GjaldSkipanina, kann skamtanin byrja innan 14 dagar.

Skamtanartoymið setur seg í samband við teg ella kontaktpersón­in, sum stendur á tilmeldingarskjalinum, fyri at áseta, nær skamtanin skal byrja.

Tú fært vegleiðing um skamtan, tá ið tann fyrsti pakkin verður útflýggjaður. Hetta fer fram inni á apotekinum; av heimatænastuni; av røktar­starvs­fólki ella umvegis telefon av skamtanartoyminum.

Fyrstu ferð tú fært skamtan, fært tú:

• Fyrstu skamtanarrulluna
• Ein plastbakka at leggja skamtanarrullur í
• Eitt yvirlit yvir heilivágin (eitt sokallað skamtanarkort) og
• Eina mappu við mynd og kunning um allan heilivágin í skamtanarrulluni

Eini 4 dagar áðrenn skamtanar­rullan er tóm, kemur næsta skamt­anarrullan við postinum.

Um tú hevur valt at koma eftir skamtanini á apotekinum, kanst tú gera tað, 4 dagar áðrenn skamt­anarrullan er tóm.

Skamtanarkortið gevur tær yvirlit yvir skamtaða heilivágin. Her sært tú, nær heilivágurin skal takast, og hvussu tablett­irnar ella hylkini síggja út.

Tú fært eitt skamtanarkort við fyrstu rulluni, og síðani hvørja ferð broyting er í heilivágnum. Læknin sær skamtanarkortið í talgildu heilsuskipanini.

Um tú hevur Vangan (sí vangin.fo), kanst tú síggja, hvør heilivágur hjá tær er í skamtan, nær næsta rulla byrjar, og hvat tú hevur goldið fyri hvørja skamtanarrullu.

Um læknin ger broyting í heilivágnum hjá tær, fáa vit á apotek­inum boðini so skjótt, sum læknin hevur broytt tað í talgildu heilsuskipanini.

Fyri at broytingin skal koma við í næstu rullu, má hetta gerast í minsta lagi 1 viku áðrenn, skamt­anarrullan verður uppi. Men um læknin ger vart við, at hetta ikki kann bíða, so pakka vit sjálvandi heilivágin fyrr.

Er heilivágurin óbroyttur í tvey ár, skalt tú seta teg í samband við læknan og biðja um at endurskoða viðgerðina, so at skamtanin kann halda fram.

Læknin fær eisini eina áminning frá skamtanartoyminum um at endurskoða viðgerðina.

Á skamtanarkortinum sæst, nær skamtanarforskriftin fer úr gildi.

Tá tú fært skamtan, rindar tú fyri einstøku tablettirnar og hylkini, sum eru í skamtarnarrulluni. Aftur at tí kemur eitt pakkigjald.

Somu tilskotstreytir eru galdandi fyri skamtaðan heilivág sum fyri annan heilivág, ið tilskot verður veitt til.

Heilsu­trygd letur eisini tilskot til pakki­gjaldið, um heilivágurin er til­skotsheimilaður.

Tú kanst lesa nærri um tilskot til heilivág her. Her sært tú eisini, hvat tú í mesta lagi kemur at gjalda um árið, um heilivágurin er tilskotsheimilaður.

Gjaldið fyri heilivág og pakking verður heintað inn umleið eina ferð um mánaðin.

Tað er ókeypis at fáa skamtaða heilivágin sendan heim.

Flestar vanligar tablettir og hylki kunnu pakkast í skamtan.

Ávísar vitaminir og onnur kostískoyti kunnu eisini verða pakkað í skamtan. Sí hvørjar her.

Upploysiligar tablettir, smeltitablettir og allar aðrar tablettir, ið draga til seg vætu, kunnu ikki pakkast í skamtan. Somuleiðis verða flestu sløg av antibiotika, hormonum og cytostatika ikki pakkað í skamtan.

Tað ber ikki til at velja ávíst merki av heilivági í skamtan. Hetta er tí, at pakkimaskinan pakkar bert eitt merki av hvørjum heilivági í senn. Les um samheitaheilivág her.

Á min.medicin.dk kanst tú síggja, hvør heilivágur kann pakkast í skamtan, og um tilskot verður veitt.

• Tøppa ynskta heilivágin inn og vel ‘priser, pakninger og tilskud’.
• Kann heilivágurin pakkast, stendur „kan dosisdisp.“ undir ‘dispenseringsform og styrke’.
• Um grønur rundingur er undir ‘Tilskud’ verður vanligt tilskot givið til heilivágin.

Um tú skalt út at ferðast, so kann apotekið pakka til 4 vikur.

Boða skamtanartoyminum frá í seinasta lagi 1 viku áðrenn.

Um ein skamtanarrulla skal burturbeinast, skulu skamtposarnir tømast, og heilivágurin verða latin inn á apotekið at burturbeina. Sjálvar posarnar við persónsviðkvæmu upplýsingunum skal apotekið ikki hava.

Um tú broytir bústað í styttri ella longri tíð, skal skamtanartoymið hava fráboðan um tað, so skamtanarrullurnar kunnu sendast á rætta stað.

Er talan um innlegging á sjúkrahúsi, og skamtanin skal steðgast, er tað ein lækni, sum skal steðga hesum inni í talgildu heilsuskipanini. Annars heldur pakking av skamtan fram sum vant. Tá tú síðani verður útskrivað/ur, er tað eisini ein lækni, sum skal virkja hetta aftur. Næsta rulla kann síðani byrja aftur eftir 7 døgum.

Vil læknin hava, at tú skalt fáa heilivágin fyrr, skal skamtanartoymið hava boð.

Tá halgidagar eru, pakkar skamtanartoymið ofta niðurfyri. Tá kann henda, at tú fært eina rullu, sum er til 4 vikur. Saman við rulluni verður kunning givin.