Ferðusluvandamikil heilivágur

Visti tú, at ávís sløg av heilivági kunnu vera eins vandamikil í ferðsluni sum rúsdrekka?

Nøkur sløg av heilivági virka doyvandi ella rúsandi. Tey kallast “ferðsluvandamikil heilivágur”, tí tey minka um reaktiónsevnini.

Niðursett reaktiónsevni kann vera vandamikið - millum annað í ferðsluni. Tú kanst verða dømd/ur eftir ferðslulógini, um tú ert so mikið ávirkaður av heilivági, at tað ávirkar koyringina.

Hvussu doyvandi tann “ferðsluvandamikli heilivágurin” er, er tengt at, hvør heilivágurin er, hvussu nógv tú tekur, og hvussu leingi tú hevur verið í viðgerð.

Men ávirkanin er eisini ymisk frá persóni til persón. Tí ber ikki til at siga frammanundan, hvussu ávirkaður ein persónur gerst. Tí er sera umráðandi, at tú ert varin sjálv/ur.

Hvussu ávirkar heilivágur við reyðum tríhyrningi?

Heilivágur, sum er merktur við einum reyðum tríhyrningi, hevur serliga vanda við sær at ávirka koyriførleikarnir. Um tú tekur heilivág við reyðum tríhyrningi, skalt tú vera varin við, hvussu tú reagerar upp á hendan heilivágin, áðrenn tú fert at koyra bil, arbeiða við maskinum e.l.

Um tú gerst doyvd/ur av heiliváginum, eigur tú at lata bilin standa.

Hesin reyði tríhyrningur verður brúktur í Danmark, Norra, Finnlandi og Íslandi. Tískil er hetta ikki eitt altjóða eyðkennismerki, og møguliga sært tú eitt annað eyðkennismerki aðrastaðni.

Dømi um heilivág við reyðum tríhyrningi er heilivágur fyri angist, ampa, andvekri, epilepsi og sjóverki. Eisini hevur onkur heilivágur fyri sterka pínu og hosta reyðan tríhyrning. 

Kann heilivágur uttan reyðan tríhyrning ávirka?

Tað er týdningarmikið at gera sær greitt, at heilivágur uttan reyðan tríhyrning eisini kann vera vandamikil í ferðsluni. Tí er altíð týdningarmikið, at tú ert varug/ur við, hvussu heilivágurin ávirkar teg.

Her kann vera talan um: 

  • sjónopsvíðkandi eygnadropar, ið kunnu ávirka sjónina, so tú ikki sært so væl.
  • heilivág fyri ov høgt blóðtrýst, ið kann geva svimbul í byrjanini av viðgerðini.
  • ov nógv insulin ella heilivág fyri sukursjúku, sum kann føra til ov lágt blóðsukur.
  • heilivág fyri ovurviðkvæmi.
  • heilivág fyri turran hosta.
  • heilivág fyri tunglyndi. 

Eisini kunnu ávís sløg av náttúruheilivági ávirka reaktiónsevnini. Her er tað serliga náttúruheilivágur, ið inniheldur valeriane (baldrian), ið tú skalt geva gætur. 

Hvussu kann eg vita, um heilivágurin er ferðsluvandamikil?

Tú eigur at vera sera varin, áðrenn tú setur teg aftan fyri róðrið, um tú hevur tikið nýggjan heilivág og kennir teg illa fyri, ávirkaða/n ella øðrvísi, stutt eftir at tú hevur tikið heilivágin. Heilivágurin kann hava ferðsluvandamikil hjáárin. Virknaðurin kann vera stuttur, men tað týdningarmesta er, at tú sjálv/ur ert varug/ur við, hvussu tú reagerar. Vit reagera øll ymiskt upp á sama slag av heilivági. 

Kann ferðsluvandamikil heilivágur nýtast saman við rúsdrekka?

Um tú drekkur rúsdrekka saman við ferðsluvandamiklum heilivági, kann tann doyvandi virknaðurin økjast. Eisini kann doyvandi virknaðurin økjast, um tú tekur fleiri sløg av ferðsluvandamiklum heilivági.

Hugsa um hetta, áðrenn tú fert at koyra

Ivast tú, skalt tú spyrja apotekið ella læknan, um tú kanst koyra bil við heiliváginum.

  • Kanna altíð, um tín heilivágur er merktur við einum reyðum tríhyrningi, og ver varin!
  • Um tú fært heilivág, sum hevur ein reyðan tríhyrning, ella um skamtanin broytist, er týdningarmikið, at tú veitst, hvussu tú reagerar upp á hendan heilivágin, áðrenn tú fert at føra akfør.
  • Les kunningarseðilin í heilivágspakkanum. Har kanst tú lesa um hjáárin, og um heilivágurin ávirkar annan heilivág ella rúsdrekka.
  • Um tú byrjar eina heilivágsviðgerð fyri sálarliga sjúku, sukursjúku, pínu ella ov høgt blóðtrýst, ella um skamtanin broytist í tíni viðgerð, skalt tú tosa við læknan, um tað er neyðugt at lata bilin standa.
  • Rúsdrekka og ferðsluvandamikil heilivágur eru ein vandamikil blanding. Rúsdrekka – einans eitt glas av víni ella ein øl – kann økja tann doyvandi virknaðin av heiliváginum nógv.
Upplatingartíðir