Ferðaverkur

Eyðkenni við ferðaverki eru í byrjanini høvuðpína, dølskni og roði, sum síðan fara yvir í bleikt dæmi, kaldasveitta, vaml, spýggju, og muðurin gerst turrur.

Ferðaverkur kann fyribyrgjast við tablettum ella plástri.

Ein annar møguleiki er at royna Sea-band®-armbandið fyri ferðaverk og vaml. Sea-band setur kropsins egnu verju í gongd fyri sjóverk og bilverk. Veikt trýst verður lagt á akupressurpunkt undir handliðunum – sama sum í akupunktur-viðgerð; men við ongum nálum. Harafturat eru fleiri, ið nýta tað fyri barnakonuvaml.

Ymiskt er, hvat av hesum riggar best, so spyr teg fyri á apotekinum.

Bæði tablettir og plástur eru at fáa í handkeypi.

Tablettir skulu vanliga takast ½-1 tíma áðrenn fráferð og virka í 4-12 tímar. Plástrið skal harafturímóti setast á 5-6 tímar fyri fráferð og virkar í 3 samdøgur.

Flestu tablettir av hesum slagi eru merktar við reyðum ávaringartríhyrningi, tí tær kunnu vera doyvandi – nakað, ið bilførarar eiga at hava í huga. Somuleiðis eiga vit at minnast til, at tablettir kunnu økja um virknaðin av alkoholi.