Sveittatálmandi evni

Um tú sveittar illa undir arminum, gerst tað ikki betri, um tú nýtir klæðir úr tilgjørdum klædnatilfari og klæðir, ið sita ov tætt at kroppinum. Betur er at nýta bummulsklæði og onnur klæði, ið ikki eru gjørd úr tilgjørdum tilfari.

Sveittar tú illa um føturnar, skal tú ikki nýta skógvar, ið eru ov tættir.

Eitt gott kropsligt reinføri saman við sveitta-fyribyrgjandi evnum verja fyri ringum lukti.

Evni, sum fyribyrgja ringum sveittalukti, eru ein partur av dagliga reinførinum hjá flestu fólkum. Hesi evni eru sóttreinsandi og verða kallað deodorantar, og tey tarna bakteriunum í at niðurbróta evnini í sveittanum til illaluktandi evnir. Tey gera sostatt einki við sveitta-nøgdina.

Onnur evni eru, sum ávirka sveittanøgdina, og hesi verða kallað antiperspirantar. Antiperspirant verður nýtt, tá sveittamongdin er størri enn vanligt. Her verður serliga hugsað um sveitta undir arminum og fótasveitta. Tey sveittatálmandi evnini minka um sveittamongdina og forða teimum nervaimpulsum, ið seta gongd á sveittaútskiljingina. Aluminiumklorid er eitt dømi um sveittatálmandi evni. Hetta evnið virkar so, at tað læsir endarnar á sveittakertlunum saman.

Tað finnast eisini vørur, ið bæði innihalda sóttreinsandi og sveittatálmandi evnir. Hesar framleiðsluvørur kunnu innihalda evni, ið eru vætubindandi, og sum kunnu virka linnandi og svalandi á húðina, t.d havalgur og aloe vera.

Vanliga er ongin trupulleiki at vaska sveittalukt úr klæðum, um tey tola vask á 95ºC. Um klæðini ikki tola so nógvan hita, eru eini ráð at stinga økið undir arminum á blusum/troyggjum í vatn blandað við evni til sóttreinsan, t.d. Rodalon® e.l. Evnið virkar ikki, um sápurestir eru eftir í plagginum.

Vaska plaggið eftir viðgerðina!

Aluminiumklorid virkar samanrykkjandi. Evnið gevur tilbúningunum eitt lágt pH-virði, ið kann viðføra staðbundna øsing av húðini. Um tilbúningurin er pH-neutralur, verður eingin staðbundin øsing av húðini.

Evnið verður nýtt í ymiskum tilbúningarformi. Á apotekinum fæst aluminiumklorid sum flótandi, roll-on, stift, liniment, spray og krem.

Liniment (kutan-væta) finst bæði við vatn- og sprittstøði sum roll-on. Tilbúningarnir verða sum oftast nýttir fyri armsveitta, men kunnu eisini nýtast fyri fótasveitta. Krem verður nýtt fyri bæði arm- og fótasveitta.

Aluminiumklorid liniment 20% roll-on frá Medic Team er grundað á vatn. Hetta verður nýtt fyri ringan sveitta og verður smurt á, tá tørvar.

Aluminiumklorid 25% spritt liniment roll-on verður nýtt fyri sera ringan sveitta, tá aðrir tilbúningar ikki hava hjálpt. Í hesum førum verður sveittamongdin tálmað í umleið 7 dagar eftir eina viðgerð. Tá steðgað verður við viðgerðini, økist sveittamongdin líðandi aftur tær næstu 3 vikurnar. Tilbúningurin verður smurdur á heilt turra húð á kvøldi áðrenn songartíð, og húðin skal lufttorna aftaná. Morgunin eftir verður húðin vaskað væl við sápu og vatni. Viðgerðin byrjar við, at smurt verður á tvey kvøld á rað, eina ferð um vikuna, til virknaður byrjar. Síðan verður viðgjørt 1-2 ferðir um vikuna, tá tørvar.

Aluminiumklorid kann elva til skriða í húðini og kann svíða, serstakliga um húðin ikki er nóg turr, tá smurt verður á.

Tað er ikki ráðiligt at nýta tilbúningin fyrr enn 2 dagar eftir hártøku undir arminum.

Aluminiumklorid kann moyrna klæðir. Hetta hendir serliga, um húðin undir arminum ikki er turr, tá tú letur teg í.

Heilivágurin propanthelin, sum finst í tablettunum Ercoril, er ein forskriftaheilivágur, sum virkar sveittatálmandi. Heilivágurin verður tó bert nýttur, um tað er serliga ringt, tí hann hevur onnur hjáárin við sær.