Húðrøkt

Á vetri er luftin turrari, og tað ávirkar eisini holdið. Tá luftin er turr, gerst húðin eisini turrari og støkkur skjótari enn annars.
Vanliga virkar holdið sum ein verja, ið ger, at vætan ikki fer úr kroppinum og verjir fyri, at sjúkuelvandi bakteriur koma inn í kroppin. Tann turra húðin, ið er farin at støkka, verjir ikki eins væl. Tí er tað av týdningi at hjúkla um tað turra holdið fyri at fyribyrgja, at vernd okkara fyri vætumissi og bakteriuálopi verður skadd.

Eini góð ráð eru at smyrja holdið við feitum smyrsli hvønn dag. Ymiskar vørur eru, m.a. Helo krem, A-derma Exomega, Danatekt ella Decubal. Krem, ið innihalda vatn, eiga at vera smurd á í minsta lagi ½ tíma, áðrenn barnið fer út.

Um summarið nýtist húðini ikki so nógv feitt. Um barnið ikki hevur turt hold, er ikki neyðugt at nýta krem ella lotión. Um tørvur er á tí, kann smyrjast við Apotekets Babylotion, A-derma Exomega lotión ella Danatekt lotión.

Smábørn, ið ikki duga at flyta seg, skulu ikki liggja í sólini og nýtast tí ikki at brúka sólkrem. Hetta kemst av, at húðin hjá børnum er ikki fullstyrknað. Best er, um barnið er í tunnum buksum, tunnari troyggju við longum ermum og sólhatti. Um neyðugt, ber til at smyrja eitt tunt lag av sólkremi á kjálkarnar, nøsina og handarbakið. Sólkrem til smábørn skal hava høgan sólfaktor, alt eftir hvussu húðin er.

Um barnið verður eitt sindur sólbrent, ber til at brúka Apotekets after-sun lotion, Aloe Vera gel ella Zink-liniment, sum kølir. Um børn yvir 2 ár verða illa sólbrend, ber til at smyrja eitt tunt lag av Hydrokortison kremi á. Um barnið hevur sóleksem, ber eisini til at nýta Hydrokortison krem. Hetta skal ikki nýtast í longri tíð, ei heldur til børn undir 2 ár uttan samráð við læknan.

Er barnið illa sólbrent og undir 2 ár – far til lækna!