Rósing viðlíkaheldur øll teknisk tól hjá Apoteksverkinum

Uppgávan er broytt nógv, síðan hann byrjaði. Framleiðslan er vaksin nógv, tryggleikakrøv eru strangari, maskinurnar eru meira framkomnar – alt er meira nýmótans á Apoteksverkinum, sum hann tekur til. 

Eitt av forvitnisligu tólunum er robotturin í kjallaranum á Tjaldurs Apoteki í Tórshavn. Hann eitur Tjalvi. Hann heldur skil á stóru heilvágsgoymsluni, ið telur eini 22.000 vørur, og er í gongd alt samdøgrið. Tá eitt starvsfólk á apotekinum skal hava fatur á einum ávísum slagi av heilivági, so verður tað plottað inn á telduna, og løtu seinni liggur tað í eini skuffu beint við síðunar av. 

Hetta sparir starvsfólki frá at ganga runt og leita ella klintra upp í stigar fyri at heinta heilivág innast á ovastu hyll. Hetta skapar eisini tryggleika við at minimera feilir – tí framkomna tøknin kennir øll sløg av heilivági (og sjálvandi er eitt menniskja, ið dupultchekkar, at tað er rætt). 

Mekanikkurin í Tjalva er hárfínur. Rósing og hansara toymi viðlíkahalda og eftirkanna sensorar og mekanikk javnan – og er tørvur á tekniskari serfrøði verður veitarin róptur inn á vøllin.

Afturat hesum kunnu vit nevna maskinaríið á framleiðsluapotekinum – rávatns- og reinvatns-dampgeneratorar (til at gera sterilt, salt- og sukurvatn), autoklava, tablett-framleiðslumaskinur (til at gera c-vitaminir, karnitin, codimagnyl, koffinautin v.m.), skamtmaskina til at pakka ávísar nøgdir av heilivág í posar.

Ein øðrvísi uppgáva, ið eisini fyllir nógv hjá Rósing og hansara toymi, er at blanda heilivág í fóður til alivinnuna. Stórir sekkir við einum tonsi av fóðri koma inn á framleiðsluna. Hesir verða tømdir í eina risastóra silo, har heilivágur verður blandaður í – og síðan koyrdur aftur í fóðursekkirnar. Tá mest stendur á kunnu teir blanda 48 tons av fóðri um dagin, ið er áleið tveir stórir trailarar av fóðri.

Uppgávurnar eru sostatt ógvuliga ymiskar og eingin arbeiðsdagur er líka.