Reglugerð fyri medisinska útgerð

Medisinsk útgerð og in vitro diagnostisk útgerð er við árunum vorðin meira og meira
framkomin. Í Føroyum hava vit higartil ikki havt nakra lóggávu ella reglugerð, sum kann fylgja vísindaligu og tøkniligu menningini á heilsuøkinum.

Tað hevur eisini verið trupult at spora medisinska útgerð tvørtur um ES, tí nógv lond hava síni egnu skrásetingareftirlit, og hesi samsvara ikki altíð. Hesar ymsu skipanirnar leggja tískil eisini eina óneyðuga tunga byrðu á framleiðarar, ið ynskja at marknaðarføra vørurnar í meira enn einum landi.

Við at seta hesa lóggávuna í verk verður medisinsk útgerð, sum verður brúkt í Føroyum og í ES munandi lættari at spora. Eisini er tøkniliga menningin av medisinskari útgerð nógv skjótari enn t.d. av heilivági. Tí er lógarverkið eisini meira hóskandi til ta nýggjaru og meira framkomnu útgerðina, sum kemur á marknaðin alla tíðina.

Fyri at kanna hvørjar vørur finnast á marknaðinum í Evropa kann EUDAMED, sum er ein miðsavnaður dátugrunnur fyri kliniska útgerð, nýtast. Dátugrunnurin hevur upplýsingar um m.a. framleiðarar, kliniskar royndir og góðkenningar. Bæði myndugleikar, sjúklingar, heilsustarvsfólk og almenningurin annars kunnu fáa atgongd. Tó er EUDAMED enn í menning, og hevur ikki allar funkur enn. Hetta væntast at koma í rætt lag í næstum.

Tryggari fyri sjúklingin

Fyriuttan at betra um trygdina við medisinsku útgerðini, hava hesar ábøtur eisini til endamáls at stuðla undir nýhugsan og nýskapan. Menning av tøkni er tað, sum eyðkennir medisinska útgerð, og ein nýggj og lutfalsliga skjót útskifting merkir, at tað alla tíðina koma nýggjar vørur á marknaðin. Júst tí er týdningarmikið við eini reglugerð, so medisinska útgerðin verður tryggari og tøkari.

Ætlar tú at innflyta og selja medisinska útgerð?

Øll, ið innflyta og selja medisinsk útgerð og in vitro diagnostiska útgerð, skulu skráseta seg hjá Landsapotekarinum. Hetta kanst tú lesa nærri um her.

Eru brek ella feilir við medisinsku útgerðini? 

Neyðugt er at fráboða Landsapotekarinum um eitt hvørt er við medisinsku útgerðini, ið kann viðføra eina álvarsama hending. Les meira um hetta og skráset fráboðanina her.